បន្ទាយមានជ័យ ៖ ទាហានឈុតខ្មៅថៃ បានឃាត់ខ្លួនពលរដ្ឋខ្មែរ រយៈពេល០២ថ្ងៃជាបន្តបន្ទាប់សរុបចំនួន៥៥ នាក់ (ស្រី១៩នាក់ ) នៅចំណុចភូមិថាប់ភិកណយ ឃុំថាប់ភិកនិងភូមិខៅណយ ឃុំក្លងណាំសៃ ស្រុកអរញ្ញ ខេត្តស្រះកែវ។
នគរបាលវរសេនាតូចការពារព្រំដែនគោកលេខ៨១៥ បានទទួលដំណឹងពីទាហានឈុតខ្មៅថៃដែលឈរជើងទល់មុខប៉ុស្ដិ៍ការពារព្រំដែនចំបក់ ក្នុងភូមិសាស្ត្រ ស្រុកម៉ាឡៃ ថានៅថ្ងៃទី៨ ខែវិច្ឆិកា មានប្រជាពលរដ្ឋខ្មែរចំនួន៣៤នាក់(ស្រី១៦នាក់) បានលួចឆ្លងដែនចូលទៅទឹកដីរបស់ថៃ ហើយត្រូវបានឃាត់ខ្លួន។ តាមការសួរនាំ គឺដើរចេញមកពីចំណុចភូមិគីឡូ៩ ស្រុកសំពៅលូន ខេត្ដបាត់ដំបង ឆ្លងអូរចូលទឹកដីថៃ ។
ករណីមួយទៀត ទាហានឈុតខ្មៅបានឃាត់ខ្លួនពលរដ្ឋខ្មែរចំនួន១១នាក់នៅវេលា ម៉ោង០៣និង៣០នាទីទាបភ្លឺ ថ្ងៃទី០៩ ខែវិច្ឆិកា ឆ្នាំ២០២១ ចំណុចមាត់អូរព្រំដែន ក្នុងភូមិសាស្ត្រ ភូមិខៅណយ ឃុំ ក្លងណាំសៃ ស្រុកអារញ្ញ ខេត្តស្រះកែវ។
បច្ចុប្បន្នពលរដ្ឋខ្មែរទាំង៥៥នាក់ត្រូវបានថៃបញ្ជូនទៅអធិការដ្ឋាននគរបាលក្លងណាំសៃ ដើម្បីមានវិធានការបន្ត៕
